Сайн байна уу

1.    Эмийн жорын маягтын ангилал, хэмжээ

1.

Эмийн жорын маягтыг энгийн, мансууруулах гэж ангилдаг.

2.

Энгийн эмийн жор нь А6 /105 х 148,5 мм/ хэмжээтэй хэвлэмэл маягт.

3.

Мансууруулах эмийн жор нь 90х120 мм хэмжээтэй хэвлэмэл маягт. Баруун дээд булангаас зүүн доод булан хүртэл 5 мм-ийн өргөнтэй, шар зураастай байна. Мансууруулах эмийн жорын маягтыг авахдаа байгууллагын албан тоот, өмнө нь авсан мансууруулах эмийн жорын маягтын тайланг Эрүүл мэндийн сайдын ... тушаалд заасны дагуу гаргаж, мөнгө тушаасан баримтын хамт ЗГХА-ЭМГ-т өгнө.

/Мансууруулах эмийн жорын маягтыг Засгийн газрын хэрэгжүүлэгч агентлаг Эрүүл мэндийн газар нэгдсэн журмаар хэвлэж, дугаарлан байгууллагын тэмдэг дарж, баталгаажуулан түгээж байна.

2.    Эмийн жор бичих

1.

Эмчлэх эрх бүхий хүний их, бага эмч өвчтөнд оношийн дагуу жор бичнэ.

2.

Эмийн нэрийг олон улсын (Generic) нэршлээр нь латинаар, уламжлалт эмийг монгол нэрээр латин галигаар бичнэ.

3.

Эмийн нэр бүрийг шинэ мөрнөөс том үсгээр эхэлж, харьяалахын тийн ялгалд бичнэ. Өвчтөнд эмийг яаралтай олгох шаардлага гарвал жорын зүүн буланд “cito” (яаралтай) гэж бичнэ.

4.

Жорыг бэх, тосон балаар тод гаргацтай бичих бөгөөд баллаж, засварлаж үл болно.

5.

Жорд шингэн эмийг мл ба дуслаар, бусад хэлбэрийн эмийн тунг грамм (gr)миллиграмм (mg), микрограмм(mcg)-аар илэрхийлж бичнэ.

6.

Олон найрлагатай эмийн жорыг бичихдээ эхлээд гол үйлдэл үзүүлэх эмийг (basis) дараа нь туслах чанарын эмийн бодис (adjuvans), үүний дараа эмийн амт, үнэр, өнгийг засах хольцбодис (corrigens) , хамгийн сүүлд эмийн хэлбэр оруулах бодис (constituens)- ыг тус тус заан дэс дараатай бичнэ.

7.

Жорд бичигдсэн эмийн тун адил байвал сүүлийн эмийн нэрийн ард “ana” (адил хэмжээгээр) гэдэг үгийг “aa” гэж товчлон бичээд тунг заана.

8.

Энгийн эмийн жорын маягтад гурваас илүүгүй, сэтгэц нөлөөт эмийг хоёроос илүүгүй, мансууруулах эмийн жорын маягтад нэг эмийг бичнэ.

9.

Сэтгэц нөлөөт эмийг энгийн эмийн жорын маягт дээр бичнэ.

10.

Сэтгэц нөлөөт эмийн жоронд эмнэлгийн тэмдэг дарж баталгаажуулсан байна.

11.

Хөнгөвчлөх эмчилгээнээс бусад тохиолдолд мансууруулах эмийн жорын маягтад 10 ширхэгээс илүүгүй үрэл, шахмал, лаа, туншил, 20мл-ээс илүүгүй шингэн эм бичнэ.

12.

Хөнгөвчлөх эмчилгээнд хамрагдсан өвчтөнд мансууруулах эмийг тухайн өвчтөний биеийн байдлыг харгалзан 7 хүртэлх хоногийн хэрэгцээнээс илүүгүй бичнэ.

13.

Эм хэрэглэх арга, анхаарах болгоомжлол, харилцан үйлчлэл, тохиолдож болох гаж нөлөө, түүнээс сэргийлэх арга хэмжээний тухай тэмдэглэлийг S: “Signa” (тэмдэглэ) хэсэгт товч, тодорхой, ойлгомжтойгоор монгол хэлээр бичнэ. Жишээ нь: (1 шахмалаар өдөрт 1 удаа 6,12,18,24 цагт хоолны дараа ууна) г.м

14.

Жорын маягтад бичигдсэн эмийн хооронд тусгаарлах тэмдэг (#) тавина.

15.

Мансууруулах эмийн жорыг нарийн мэргэжлийн эмчийн тогтоосон оношийг үндэслэн өвчтөний харьяалагдах өрх, сумын эмч бичиж, эрхлэгч /ахлагч/-ийн гарын үсэг, тэмдгээр баталгаажуулсан байна. Хөдөө орон нутгийн өвчтөн нарийн мэргэжлийн эмчийн хяналтан дор эмчлүүлж буй тохиолдолд түр оршин суугаа хорооны өрхийн эмч жор бичиж, дээрхийн адил баталгаажуулна.

16.

Эрүүл мэндийн даатгалын сангаас нөхөн олгох болон амбулатори, поликлиникээр үнэ төлбөргүй олгох эмийг энгийн жорын маягтад бичиж, индексжүүлэн, баталгаажуулсан байна.

3.    Эмийн санд эмийг олгох

1.

Эм баригч эмийг өвчтөнд олгохдоо уг эмийг хэрэглэх арга, давтамж, тун хэмжээ, хэрэглэх хугацаа, илэрч болох гаж нөлөөний талаар дэлгэрэнгүй мэдээлэл өгнө.

2.

Жорын маягтын ар талд жор хүлээн авсан, бэлтгэсэн, шалгасан, олгосон эм зүйч, эм найруулагч гарын үсгээ зурж, огноог тэмдэглэнэ.

3.

Мансууруулах эмийн жорын маягтын ар талд эм хүлээн авсан хүний нэр, хаяг, регистрийн дугаар, огноог тэмдэглэж, гарын үсэг зуруулна.

4.

Эм баригч жорыг бүртгэлд хүлээн авч олгосон тухай тэмдэглэнэ.